Бүгд Найрамдах Монгол Ард Улсын II их хурлын тогтоолын дагуу 1925 онд Цэцэрлэг-Мандал аймгийн Эрдэнэбулган уулын хошуунд (одоогийн Цэцэрлэг хот) анхны амбулатори нээгдсэнээр аймгийн эрүүл мэндийн салбарын тулгын чулуу тавигдсан түүхтэй.Эрүүл мэндийн яамны Төрийн нарийн бичгийн дарга Д.Очирбат тус арга хэмжээнд оролцож, Архангай аймгийн эрүүл мэндийн салбарын хөгжилд үнэтэй хувь нэмэр оруулсан үе үеийн ахмад буурлууд, эмч, эмнэлгийн ажилтнуудад баярын мэнд дэвшүүлэн, Эрүүл мэндийн Сайдын мэндчилгээг уламжиллаа.
Тэртээ нэгэн зууны өмнө эхчүүдийн ихэнх нь гэртээ төрж, төрсөн хүүхдийн тал хувь нь эндэж байсан хүнд үеэс өнөөг хүртэл асар их өөрчлөлт гарчээ. Өнөөдөр эхчүүд 100 хувь эмнэлэгт мэргэжлийн эмчийн хяналт дор төрөх болсон бөгөөд нярайн эндэгдэл 1000 амьд төрөлтөнд 7.5 промилд хүрч буурч, хүн амын дундаж наслалт хоёр дахин уртассан байна.
Энэ бол 1925 оны анхны эмч нарын хичээл зүтгэлээс эхлээд өнөөгийн өндөр технологийн оношилгоо, эмчилгээний арга барилд суралцсан, чадварлаг эмч, эмнэлгийн ажилтнуудын уйгагүй хөдөлмөрийн үр дүн юм.
Өнөөдөр Архангай аймгийн эрүүл мэндийн салбар орчин үеийн анагаах ухааны ололт амжилт, дэвшлийг үйл ажиллагаандаа нэвтрүүлж, оношилгоо, эмчилгээний чадавхаа тасралтгүй бэхжүүлэн, зайн болон хиймэл оюун ухаанд суурилсан оношилгоог ашиглаж, чанартай, хүртээмжтэй, аюулгүй тусламж үйлчилгээг иргэдэд хүргэж байна.
Түүхт 100 жилийн ойгоор үе үеийн эмч, мэргэжилтнүүдийнхээ хөдөлмөр зүтгэлийг дурсаж, цаашид салбарын цогц шинэчлэлийг хамтаар хэрэгжүүлэн, эрүүл иргэний төлөө хамтдаа ажиллахаа илэрхийллээ.
