Бүгд Найрамдах Франц болон Европын холбооноос олгох тусламжийг хүлээлгэн өгөх ёслолын арга хэмжээнд Эрүүл мэндийн сайд С.Энхболд, Европын Холбооноос Монгол Улсад суугаа Элчин Сайд Траян Лауренцю Христей, Бүгд Найрамдах Франц Улсаас Монгол Улсад суугаа Онц Бөгөөд Бүрэн Эрхт Элчин Сайд Филипп Мэрлин нар оролцлоо.
Монгол Улс, Бүгд Найрамдах Франц Улсын Эрүүл мэндийн салбар дахь харилцаа, хамтын ажиллагаа, тогтвортой хөгжиж байгаад, ялангуяа ГССҮТ болон Франц Улсын эрүүл мэндийн байгууллага хоорондын хамтын ажиллагаа өргөжиж байгаад миний бие баяртай байна гэж Эрүүл мэндийн сайд С.Энхболд онцоллоо.
Гэмтэл согог судлалын үндэсний төвд 20 гаруй жилийн турш Франц Улсын эмч, мэргэжилтнүүд ирж, орчин үеийн оношилгоо, эмчилгээний шинэ арга барилыг монгол эмч нарт зааж сургах, Франц Улсад дадлагажуулах, эмнэлэгт нэн шаардлагатай тоног төхөөрөмж ханган нийлүүлэх, сэхээн амьдруулах тасаг, яаралтай тусламжийн тасгуудыг шинэчлэх зэрэг бодитой олон ажлуудыг хийсэн байна.
Өнөөдөр Европын Холбоогоор дамжуулан Бүгд Найрамдах Франц Улсаас “КОВИД-19” цар тахалтай тэмцэхэд зориулан 54 мянган евро буюу 184 сая төгрөгийн үнэ бүхий тусламжийг манай улсад олгож байна. Эдгээр нь гэмтлийн шалтгаантай амьсгалын замын хүндрэлийн үед өвчтөнийг хүчилтөрөгчөөр хангахад туслах нэн чухал, шаардлагатай төхөөрөмжүүд юм.
Дэлхий нийтийг хамарсан цар тахлын энэ хүнд хэцүү үед Монгол Улсын эрүүл мэндийн салбарын хүндрэлтэй асуудлуудыг шийдвэрлэхэд туслалцаа үзүүлж буй Европын холбоо болон Бүгд Найрамдах Франц Улс, Францын ард түмэнд гүн талархал илэрхийлж байна.
